DECIVERSA

Deciversa ye’l nome artísticu de los asturianos Israel Sastre y Inés Álvarez. La obra d’estos dos artistes caracterízase pol usu de técniques d’ilustración y diseñu gráficu onde s’entemecen elementos de la cultura pop, l’arte urbanu y el cómic. El so estilu distínguese pol usu de colores vibrantes y composiciones dinámiques que busquen provocar una reflexón sobre la identidá y la sociedá. En Porrúa en Bolas xugaron col alimentu de les vaques antroxándolu de la comida que más-yos presta a los humanos. 

KIKO MIYARES

Artista llaniscu con estudiu en Pancar. Miyares ye conocíu pol so trabayu nel ámbitu de la pintura y, sobre manera, nel de la escultura en madera policromao. La so obra caracterízase por una esploración fonda de la figura humana y les deformaciones visuales. Miyares tien espuesto’l so trabayu en diverses galeríes y espacios culturales d’Asturies y fuera d’ella, consolidándose como ún de los artistes contemporáneos más importantes de la escena asturiana.  Nestes boles de silu, con una gama monocromática, Miyares trabaya’l retratu coles deformaciones visuales y espresiones esaxeraes que faen tan característica la so obra.

INKULTURE

Pancho Núñez y Marta Torre, poícu y llanisca respectivamente, son dos artistes del conceyu que, amás d’apasionaos pol arte visual, son fundadores y propietarios del estudiu de tatuaxes Inkulture en Llanes. El so trabayu céntrase principalmente nel mundu del tatuaxe, onde fusionen técniques tradicionales con enfoques contemporáneos, creando diseños únicos onde rescampla la so esperiencia y amplia formación.

MARIO M. MERCURIO

Artista xixonés con una obra que se caracteriza pola integración de técniques de gráfica tradicional, edición independiente y animación dixital. El so enfoque creativu aborda temes personales y cotidianos, que traduz a un llinguaxe propiu nos sos  llibros d’artista y nos proyectos individuales diversos. La so participación activa na escena underground asturiana ye una constante na so carrera, amosando una ética do it yourself que trescala la so producción artística. Nes sos boles, Mario chisga un güeyu a a música verbenera y braniega de Sonia y Selena.

CANDELA PÁJARO

Anque  vive n’Uviéu, dende bien pequeña Candela pasa los branos en Celoriu. Ye llicenciada en Belles Artes y trabaya anguaño como tatuadora. La transición de Candela al mundu del tatuaxe permitió-y fusionar la so formación académica con una forma d’arte más intima y personalizada. Ella mesma describe’l tatuaxe como una disciplina que va acullá de la rellación tradicional ente creador y observador, creando un venceyu fondu coles persones al traviés de les sos obres.

Candela realizó dos intervenciones nesta primer edición: na primera representa a les veraniantes de Celoriu, na segunda un porruanu y una llanisca.

SANDRA ESTRADA

Nacida n’Uviéu, ye artista plástica y música. La so obra artística caracterízase por una esploración profunda de la rellación ente la forma y el soníu, integrando elementos visuales y musicales nes sos creaciones.

ARTIS-TEO

Teo ye un artista llaniscu mozu qu’anguaño ta estudiando Belles Artes en Madrid. El so estilu tien muncha influencia del mundu del cómic y del graffiti, como podemos ver na so bola.

MS. HYDE

Aida vive en Los Caleyos y ye Graduada en Diseñu pola ESAPA. Dedícase tanto al diseñu como a la ilustración freelance y la so obra ta rellacionada cola so rodiada: el mundu rural, qu’analiza siempre con tonu irónicu.

JAVIER SOTO

Javier Soto ye surferu y artista plásticu; anque d’aniciu gallegu, crióse dende los cinco años en Navia, u desarrolló un venceyu bien fondu col mar y el surf, lo que se treslluz de contino na so obra y na so marca de ropa “Miedo a las olas”

C0VC0

Covadonga Casado González, conocida artísticamente como C0vc0, ye una artista interdisciplinar nacida n’Uviéu. La so obra abarca disciplines diverses, qu’incluín el dibuxu, la pintura y la ilustración, con un enfoque contemporaneu y provocador.

NIEVES GONZÁLEZ

Nacida en Porrúa, ye llicenciada en Belles Artes y directora de Porrúa en Bolas. La so obra inspírase sobre manera na tradición y cultura asturianes, especialmente na zona de Llanes, onde medró y caltién un fondu venceyu. Nieves fusiona elementos tradicionales con temátiques contemporánees, creando un llinguaxe plásticu que bebe del folclore, el punk, el kitsch y el mundu del tatuaxe.

MARIANA FANO

 Mariana Fano ye una artista asturiana reconocida poles sos pintures en güevos. Ye llicenciada en Belles Artes y especialista en restauración. La so inspiración artística llegó-y depués de dir a vivir a La Pola Siero y conocer la fiesta de los Gúevos Pintos. Sicasí, el so enfoque estrémase del tradicional: vacía los güevos, blánquialos, rellénalos con espluma poliuretano pa da-yos resistencia y píntalos depués con acuarela, reproduciendo con una precisión notable obres maestres de la historia del arte.

ANIRA DREAMS

 Marina ye una estudiante de Belles Artes de la UCM que taba pasiando per Porrúa mientres yera’l festival y mos regaló esta bola.