III Edición 2023

SUMIN PARK

Surcoreana y diplomada en Belles Artes en Francia, tien esperimentao cómo la vida la lleva per caminos estremaos. Residió en Madrid dellos años alloñada del arte. Sicasí, el so viaxe a Asturies l’añu pasáu despertó’l so amor por esta tierra, y agora reside en Xixón onde retomó’l camín artísticu.

Les sos obres son un reflexu íntimu del tiempu y la memoria, como un diariu visual; les boles de silu, por exemplu, representen les vistes de Park nel momentu de la so creación.

MADE IN CHIGRE

Proyectu artísticu nuevu creáu pola ilustradora Beatriz Menéndez, Made In Chigre busca retratar y poner en valor la riqueza etnográfica y natural d’Asturies, celebrando les sos tradiciones y idiosincrasies dende una perspectiva contemporánea con bien de ciñu y retranca.

CECILIA DÍAZ

Ilustradora y diseñadora gráfica, trabaya como freelance ente Madrid y Xixón. Inspírenla la naturaleza y les coses del día a día, y anque suel utilizar técnica dixital, interésa-y tamién tolo analóxico y esperimentar con materiales y técniques diverses.

CARLETI LÓPEZ TRAVIESA

Artista multidisciplinar, anque enfocáu na pintura dende cuantayá, Carlos nació en Llanes,, ye llicenciáu en Belles Artes y vive y trabaya ente Ciudá de Méxicu y Asturies. La cultura de cai y l’internet son referencies clave pal so trabayu. Utiliza’l procesu pictóricu como métodu de nexu ente la realidá y el mundu dixital, iguando un códigu iconográficu personal.

FONI ARDAO

Xixonés de vocación artística temprana y desarrollu autodidacta al que’l gustu pol dibuxu y la pintura acompañaron siempre. Foni espresa’l so arte sobre cualquier soporte, yá seya llenzu, papel, un mural, un monopatín, un tueru d’árbol o una tablet. Arquitectu técnicu pola Universidá d’Alicante. Foni ye tamién un pioneru del movimientu skater de los 80 n’Asturies.

GUILLERMO MENÉNDEZ QUIRÓS

Asturianu de Llangréu, ye graduáu en Belles Artes y especializóse en cómic y novela gráfica, anque tamién trabaya’l xéneru audiovisual y la ilustración, n’ámbitos como’l cartelismu o’l diseñu de portaes. Collabora tolos meses cola tira “La CUENCA Buena” nel periódicu La Cuenca del Nalón. Depués de pasar pela autoedición y los fanzinos, ganó l’áccesit del concursu ArtNalón 2020 cola obra “Desindustrialización y resistencia” y publicó los cómics Herederos de Euskalduna (2019) y Leonardo. La Epopeya (2020), a los que siguieron les noveles gráfiques Galdós.Un escritor en Madrid (2020), Milicias Vascas Antifascistas (2021) y Ana María. La llobera d'Asturies (2023), obra ganadora de la XIV edición del concursu Alfonso Iglesias de cómic en Llingua Asturiana. La so última novela gráfica ye Cumbres en Pie de Guerra. La batalla de El Mazucu, temática que también representa na bola d’esta edición.

ANORA ASHUROVA

Procedente de Siberia, instálase en Llanes depués de terminar la carrera d’Arquitectura y Belles Artes. Equí abrió una escuela d’arte pa neños y adultos y más alantre un estudiu de tatuaxe. La so pasión ye trabayar con restos d’animales atopaos na naturaleza, llabrando los cránios o pintándolos. Na so obra pa Porrúa en Bolas trabayó a comuña colos sos dos fíos.

SAMUEL RANGEL

Artista venezolanu, anguaño Samuel reside en Siero, u tien un estudiu. Vien d’una familia d’artes y dende neñu dedicóse a la pintura, que trabaya dende’l realismu centrándose sobre manera nel paisaxe, atendiendo especialmente pal color.

SONEK

Dedícase a la pintura mural dende 2006. Anguaño investiga la so rellación col entornu y otros formatos en Proa, Espaciu de Creación Contemporánea. La estética sobre la que trabaya ye un xuegu de composición por y pa disfrutar visualmente. La so investigación continua quier estimular la imaxinación, y la execución del so trabayu, más cercanu a una performance, esplica’l desarrollu y los resultaos.

TRÉMULA

Graduada en diseñu, ye una apasionada de la tradición y el mundu rural. Cola so serie Paisaneo, inspirada en persones reales del archivu históricu asturianu, realcuéntrase col pasáu pa da-y una vuelta nueva a la vida xugando colos tramaos, al igual que fai nestes boles, que representen los llabores del campu.

PANCHONE

Artista cántabru residente en Porrúa, formóse en Belles Artes na Universidá de Salamanca y especializóse en dibuxu, cómic, y ilustración na Universidá de Granada. Meciendo surrealismu y abstracción, igua composiciones qu’axunten escenarios imaxinarios dando-y muncha importancia, tamién, al usu del color. En xunto, provoca un efectu psicodélicu que se potencia al utilizar la pintura pa dar movimientu a les imáxenes y provocar la sensación de que s’esfaen nel espaciu.

HUGO MUÑIZ

Ilustrador de Xixón especializáu nel grabáu y estampación con llinóleu. Los sos dibuxos y murales tan influenciaos por esta técnica, davezu monócroma y mui plana. Dedícase tamién a vender ropa y accesorios baxo’l nome de @dark_artchemy.

CONSTANTINO MENÉNDEZ

Afincáu en Castrillón, dende pequeñu tuvo venceyáu a les artes plástiques, con querencia dende bien ceo polo testil. Estudió moda y confección y en 2011 fundó la marca "made by kÖS". Trátase d’un proyectu de diseñu de moda que nel so aniciu bebe de la moda histórica y de la indumentaria tradicional asturiana.

El so trabayu axunta pasáu y presente p’algamar d’esta miente diseños con identidá histórica y de la indumentaria tradicional asturiana.