IV Edición 2024

PAULA RUBIO INFANTE

Residente en Niembru, recibió’l  premiu El Ojo Crítico 2015 d’Artes Plástiques y el VIII Premiu ARCO Comunidad de Madrid a Jóvenes Artistas 2011. La so obra abandonó lo conceptual del principiu pa tender al realismu centráu na observación de la naturaleza, concretamente de les aves, como vemos nes sos boles de silu.

LUCÍA ASTUY

Avilesina, estudió Diseñu Gráficu  en La Escuela d’Arte d’Uviéu, onde se formó pa exercer como cartelista y diseñadora de branding. Autoedita fanzinos dende l’adolescencia y dende entós nunca paró de facelo. En 2018 llevo la so carrera a la ilustración y n’actualidá desenvuelve la so faceta d’artista plástica na pintura nel so estudiu de Madrid.

CLARA NIETO

Ilustradora y diseñadora orixinaria de Ḥontoria. Destaca pola capacidá pa mecer la ilustración col diseñu, creando mundos imaxinarios qu’espeyen la so visión personal y emocional. Colos  sos proyectos crea mundos nuevos nos que, según diz, prestaría-y pola vida vivir, utilizando’l dibuxu como un exerciciu pa comprender la so rodiada y a sí mesma. El so oxetivu ye evocar sensaciones de paz y señaldá, creando atmósferes con formes sueves y un usu delicáu del color. Les sos ilustraciones funcionen como un diariu personal y un espeyu nel que l’espectador pue reflexase.

LLUCI MIRAVALLES (RINGO-RANGO)

Lluci Miravalles ye la creadora de Ringo Rango, un proyectu que nació en 2013 como taller d’indumentaria tradicional y que dende 2020 ye una marca de moda. Toles prendes y complementos de Ringo Rango tán inspiraos na indumentaria y la cultura popular asturiana y fabricaos n’Asturies.

EVA BOLLEY

Artista francesa afincada n’Asturies, maraviyada siempre colos espacios abiertos y el poder de la naturaleza, Eva busca cola so pintura tresmitir l’almiración pa con esti espectáculu grandiosu, lentu o rellumante que’l nuestru planeta mos apurre tolos díes. 

ELISE FLORENTINO

Nacida  en Santu Domingu y residente n’Uviéu, destaca nel dibuxu contemporáneu, esplorando técniques diverses según la historia que quier narrar. El so estilu entemez lo minimalista colo maximalista, texendo davezu histories personales qu’oscilen ente la comedia y la señaldá.

ELIZA SOUTHWOOD

Artista d’aniciu británicu, ta afincada nun pueblu del conceyu Villaviciosa, y trabaya dende la so galería/taller de La Villa. Ta especializada en grabáu —serigrafía y llinograbáu—, pero tamién pinta y dibuxa. Les sos obres y ilustraciones tán en munches colecciones a lo llargo’l mundu.

VANESSA RIESGO (PAESICA)

Vanessa Riesgo ye la diseñadora gráfica y ilustradora tres del  nomatu de Paesica. L’arqueoloxía, la historia, el folclore, la tradición oral, la mitoloxía, l’arte y la cultura popular son representaos davezu por Vanesa col usu de diverses técniques y soportes. Riesgo utiliza l’arte como canal conductora pa representar l’imaxinariu etnográficu y cultural del ámbitu atlánticu español, poniendo focu sobre les cultures asturiana, gallega y vasca.

ENEARTE

Nel, natural de Porrúa, ye un artista mozu que ta acabante d’entamar camín nel mundu del arte. Anque nunca tuvo claro qu’esti diba ser el  so oxetivu, la perspectiva cambió-y dafechu cuando decidió cursar un bachilleratu artísticu en Cangues d’Onís. Anguaño estudia Belles Artes en Salamanca y la so obra ye una reivindicación constante de la diversidá sexual.

INÉS BENITO

Con raigaños en Pravia, esta artista destaca nel mundu del arte con una mezcla única de pintura y ilustración, complementada con performances creatives y instalaciones sorprendentes cargaes siempre de notes d’humor. Depués de graduase en Belles Artes en Salamanca, traxo la so creatividá p’Asturies, onde continuó la so formación n’edición d’arte na Escuela d’Arte d’Uviéu.  

IYÁN CASTAÑO

Ye un artista plásticu asturianu especializáu en grabáu y pintura, ganador del Premiu Asturies Xoven de les Artes Plástiques 2023. Realiza les obres sobre arena de la Ría de Niembru, onde inmortaliza les sand ripples.

MARTÍN CARRERO

Orixinariu de Puertas de Vidiago, estudió arte en Bilbao, peracabando la formación den 2022. Una de les sos obres más destacaes ye “El Mapa de Martín”, una pieza de gran formatu que representa’l conceyu Llanes. El mapa ofrez una panorámica detallada de la xeografía la naturaleza y aspectos históricos, etnográficos y culturales de la rexón, promoviendo una actitú y un modelu de desarrollu sostenible que busca la conservación y meyora del entornu pa les xeneraciones futures. 

PABLO PIÑERA

Porruanu de corazón y psicólogu de profesión, Pablo Piñera ye un artista qu’alcuentra na pintura la mayor pasión. Pa él, l’arte nun ye solo una forma d’espresión personal, sinón tamién un venceyu significativu coles persones importantes de la so vida. La so obra reflexa una conexón emocional fonda y una mirada introspectiva, qu’axunta la so formación como psicólogu cola so sensibilidá artística.

RAQUEL LOBO

Nacida en Llanes, graduóse en Belles Artes en Madrid, onde anguaño desarrolla la so obra artística en campos como la pintura, l’animación o’l diseñu. Les sos imáxenes, d’estilu claru y colores vivos y azucaraos, muestren mundos inquietantemente sosegaos habitaos por seres ente lo humano y lo animal.

SARA OJANGUREN

Arquitecta y diseñadora asturiana afincada en Barcelona con una carrera creativa llarga y multidisciplinar. Tien desarrollaos proyectos d’arquitectura, interiorismu, escenografía y diseñu d’oxetos. Paralelo a la so faceta como diseñadora, destacó pola so práctica como baillarina y coreógrafa. La so obra destaca por ser sensible y reflexiva, con una capacidá particular pa escuchar la realidá que la arrodia y que la habita.

SONEK

Dedícase a la pintura mural dende 2006. Anguaño investiga la so rellación col entornu y otros formatos en Proa, Espaciu de Creación Contemporánea. La estética sobre la que trabaya ye un xuegu de composición por y pa disfrutar visualmente. La so investigación continua quier estimular la imaxinación, y la execución del so trabayu, más cercanu a una performance, esplica’l desarrollu y los resultaos.