El programa educativu del PEB va desenvolvese la primer vez na edición de 2025 y busca que l’alumnáu de bachiller d’artes o matriculao en FPs artístiques ellabore un proyectu d’intervención sobre una bola de silu. D’ente toles persones estudiantes participantes va escoyese una pa participar na edición de 2025.

BASES

● Namás va poder participar nesta propuesta l’alumnáu matriculao en Bachilleratu Artísticu o en graos de Formación Profesional de la rama artística en centros asturianos.

● La participación va ser individual, dirixida por una persona docente o representante del centru educativu.

● Hasta que s’escueya estudiante pa participar, la persona docente va ser la interlocutora ente’l centru y la organización del programa “Porrúa en bolas”

● Si quien participa ye menor d’edá, la propuesta ha dir acompañada d’una autorización espresa d’una persona tutora llegal pa la participación n’actividá nel casu de que s’escueya (solicitar per meil).

● Cada participante ha realizar una propuesta en PDF que contenga los apartaos siguientes:

○ 1. Portada con: títulu de la intervención artística, nome’l centru, cursu y un númberu de referencia que la persona docente tendrá asignáu a cada participante (nun pue apaecer el nome)

○ 2. Bocetos previos (cantidá llibre; van valorase’l procesu creativu, les anotaciones, les prebes cromátiques, etc…).

○ 3. Maqueta o dibuxu final detalláu de la propuesta (pue ser un dibuxu analóxicu, dixital, maqueta 3D, escultura fotografiada, etc, pero ha unviase, en tou casu, una imaxe).

○ 4. Xustificación de la obra (máximu una páxina):

■ Esplicación del significáu de la intervención.

■ Relación col contestu del programa "Porrúa en Bolas" y l’entornu rural.

○ Llista de materiales necesarios pa executar la obra.

Les persones docentes o encargaes de cada centru han unviar un mail a porruaenbolas@gmail.com, conseñando “Programa centros PEB + nome del centru” nel asuntu, qu’incluya:

● Los PDFs coles propuestes del alumnáu (pueden dir en varios emails numberaos. Ej “Asunto + 1”, Asunto + 2”, etc)

● Una llista colos códigos de cada participante conseñando’l nome y fecha de nacimientu que correspuende a caún.

● Formulariu d’inscripción pa docentes firmáu (escaniáu)

● Autorizaciones de participantes menores d’edá (escaniaes)

Plazu presentación

● El plazu pa unviar propuestes abre’l 11 de abril de 2025 y pieslla’l 2 de xunu 2025 a les 23:59 h.

● Las propuestes unviaes fuera plazu nun van ser consideraes.

Criterios de valoración

Un xuráu compuestu por representantes de la organización de “Porrúa en Bolas” y de l’Asociación Cultural Llacín va evaluar les propuestes acordies colos criterios siguientes:

1. Calidá artística y orixinalidá del diseñu (30 puntos).

2. Cantidá y calidá de los bocetos previos (20 puntos).

3. Viabilidá técnica de la propuesta (15 puntos).

4. Sostenibilidá de los materiales propuestos (15 puntos).

5. Rellación de la intervención col programa "Porrúa en Bolas" y el mundu rural (20 puntos).

Selección

● La persona escoyida va participar nel festival "Porrúa en Bolas"; convidada como artista, interviniendo a lo llargo’l día una de les boles de silu col so diseñu.

● La organización va proporcionar:

○ Materiales necesarios pa la intervención.

○ Xinta y cena’l día de la intervención, xunto al restu artistes.

○ Apaición na web y nes redes sociales del eventu como "Artista 2025", cola mesma visibilidá y algame que’l restu artistes.

● Nun s’inclui agospiu, pola posibilidá de que la persona participante seya menor d’edá.

● La persona que s’escueya pa participar ha asegurar el desplazamientu al eventu (o pelo menos hasta Llanes, onde la pue recoyer un miembru de l’Asociación Cultural Llacín).

Derechos y compromisos

● La obra presentada ha ser orixinal y nun ha tar presentada a otros concursos con anterioridá.

● La organización va poder utilizar les imáxenes del procesu creativu y de la obra final con fines de difusión y promoción del festival.

● La organización namás va utilizar la imaxe de quien s’escueya cola so autorización o, nel casu de menores d’eda, de la persona tutora.

● La persona seleccionada comprométese a asistir y realizar la so intervención nel festival nel día que se-y asigne.

Page updated

Google Sites

Report abuse