Porrúa en bolas - V Edición

BITXO

Laura Lara, (Bitxo) ye fundadora del Proyectu Raposu Roxu y co-directora y responsable de los procesos de mediación del Festival de Muralismu Contestual Pareesfest (Uviéu). Ilustradora, muralista y mediadora artística, tien una perspectiva tan única como’l so mundu creativu. Dende un pueblín asturianu asitiáu en Piloña, lloñe de la ciudá, desenvuelve una obra desenfadada, crítica, máxica y fuera de lo común. Les sos

creaciones son un españíu de color que fala de muyeres empoderaes, de pueblu y de cuidaos.

CHYLO

Chylo ye muralista, pintor y ilustrador asturianu, residente en Xixón. Nel so trabayu trata de captar el momentu de transición ente lo real y lo irreal, inspirándose n’elementos populares, el simbolismu y la so propia mitoloxía personal, pa dar llugar a una realidá fantástica estrada de personaxes y oxetos. Anque la so ferramienta principal ye la pintura, tamién recurre a la instalación interactiva, la escultura, l’animación y l’artesanía.

DIGO DIEGO

Digo Diego, que vive nuna furgoneta, utiliza l’arte urbanu como una ferramienta de tresformación, alderique y construcción colectiva. La so formación universitaria n’Educación Social inflúi de forma determinante na so práctica artística, entendiéndola como un mediu que fai posible cuestionar les dinámiques sociales qu’habitamos, visibilizando formes de vulnerabilidá munches veces silenciaes.

ENRIQUE DÍAZ GONZÁLEZ

Enrique Díaz González, nietu de rotulista de Cangues d’Onís, emprecipió como graffiteru, lo que-y marcó la forma d’entender la imaxe y el trazu. Estudió diseñu gráficu n’Uviéu y dende entós vive de la profesión. Amás d’a la tipografía, dedicó gran parte de la so carrera a la dirección d’arte y ilustración p’aplicaciones educatives infantiles, desarrollando repositorios d’ilustración y universos visuales pa marques del sector.

ERUHONDA

Eruhonda (Alejandra Suárez Lavilla) ye ilustradora y diseñadora asturiana. Como munchos compañeros de profesión, dende mui neña tuvo claro que la so pasión yera cuntar histories colos sos dibuxos, fechos con medios dixitales y adaptaos a la so forma d’ilustrar pa xenerar testures nueves y poder dar vida a los sos personaxes y escenes.

IRATXE ESTEVE

Iratxe Esteve estudió’l Grau en Creación y Diseñu pola Universidá del País Vascu y vive dende entós ente Asturies y Bizkaia. Nacida en Xixón, la so trayectoria artística ta venceyada sobre manera a Lluanco, u ta representada por una galería d’arte llocal, y la so

obra y desarrollu conceptual funde los raigaños na idea de paisaxe y territoriu, mui especialmente de la costa y la mar. Escoyida na Muestra d’Artes Plástiques del Principáu d’Asturies, el so trabayu básase sobre too na fotografía, la escritura y el diseñu, que se

presenten acullá de la so bidimensionalidá.

CARLOTA GONZÁLEZ DE LA ROSA

Carlota González de la Rosa, moza de Xixón, ta terminando cursar el Grau d’Arte cola especialización en pintura na Universidá del País Vascu. Pa Porrúa en Bolas quixo escoyer un elementu tan característicu d’Asturies como son les madreñes, pa trabayar cola pallabra y la imaxe y tener la oportunidá de pintar baxo’l conceptu de módulos, nuna composición que xuega cola repetición sobre soporte tridimensional.

VERÓNICA GRECH

Verónica Grech ye llicenciada en Belles Artes pola Facultá de San Carlos de la Universidá Politécnica de Valencia. Combina’l so trabayu n’ilustración cola docencia nel ámbitu de la Didáctica y l’Arte. Dende’l so estudiu d’Avilés, onde nació, trabaya en proyectos pa prensa y publicidá, con una trayectoria reconocida con premios internacionales.

LUKA THE PAU

Paula Recio ye artista multidisciplinar autodidacta asturiana. Echó a andar la so trayectoria creando la so primer marca, “lukathepau”, dedicada a la decoración y el mobiliariu artesanal. Depues treslladóse a Barcelona, onde estudió escenografía, escaparatismu y merchandising visual, ganó varios premios de creatividá y trabayó en dirección artística, dirixendo y realizando diferentes esposiciones y decoraos. De vuelta a Asturies, monta’l so taller propiu en Parres, Llanes, dende onde se dedica dafechu a la serigrafía y a la ellaboración de tapices sobre telar tradicional; imparte clases de creatividá y artes plástiques, tamién, como actividá estraescolar.

CE PANDIELLA

Celia Pandiella ye una ilustradora de la cuenca minera del Nalón (Asturies). Dende bien neña fascinóse coles histories y lleendes de la so tierra, onde atopó fonte d’inspiración, y el folklore, la mitoloxía y la maxa son los elementos que más rescamplen nel so trabayu. Artista multidisciplinar y n’aprendizaxe continuu, emprecipió con métodos de dibuxu tradicionales valiéndose de técniques mestes, anque nos últimos años centró’l trabayu sobre manera nel arte dixital, meciendo elementos clásicos con una estética moderna.

AINOA RIESCO

Ainoa Riesco, llicenciada en Filoloxía Inglesa y Hispánica y graduada n’Historia del Arte, con títulos en Periodismu Cultural y Lliteratura, ye cofundadora del taller d’estampación artística Ora Labora Studio de Xixón. Como artista suel usar tecniques estremaes de grabáu como l’aguafuerte, l’aguatinta o’l llinoleu, aplicaes a temes venceyaos a la memoria, la identidá y el territoriu, centrando l’atención sobre espresiones populares y tradiciones propies del noroeste español.

JONÁS SAN MIGUEL

Jonás San Miguel, natural de Llanes, ye la revelación más moza de la pintura asturiana. Acabante rematar el Bachilleratu d’Artes n’Uviéu, fo escoyíu na Muestra d’Artes Plástiques del Principáu d’Asturies, tien espuesto individualmente na Sala Borrón y recibió’l premiu Astragal. El so trabayu espresionista, de muncha espontaneidá, tien como filu conductor un relatu sobre manera esistencial y autobiográficu.

HELENA TORAÑO

Helena Toraño, que vive y trabaya ente’l so Llanes de nacencia y Uviéu, fo Premiu Asturies Xoven d’Artes Plástiques en 2014. Llicenciada en Belles Artes pola Universidá del País Vascu, la pintura ye la so dedicación principal, con bien d’esposiciones individuales y colectives y obra escoyida pa certámenes y concursos rexonales y nacionales. Ta representada por una galería de Xixón. Tamién tien realizao murales de gran tamañu, collaborao en campañes publicitaries y ilustrao eventos de revistes de moda. Aparte de l’actividá plástica, ye parte del dúu musical Los Bonsáis, qu’editó varios discos y del que s’ocupa tamién de la imaxe.

CASA EN LLAMAS

Casa en llamas ye una asociación formada en 2023 por cuatro artistes multidisciplinares —Andrea Abril, Alejandra Fernández Allende, Laura Gallego y Belén Sierra—, especializada en pintures murales. Les integrantes desarrollaron proyectos rellacionaos

colos ecofeminismos, la intimidá y la memoria, ente otros temes, y les sos obres espusiéronse en galeríes como EST_ART.

FRANCISCO YÉVENES

Francisco Yévenes ye l'estudiante escoyíu para participar nesta edición del PEB col so proyectu "Bola Potato", anguaño cursa 1º de Bachiller d'Artes nel Palaciu de Granda y la so intención ye estudiar arte na Universá.

Page updated

Google Sites

Report abuse