II Edición - 2022

GILDO SOBRINO

De padre porruanu, Gildo nació en Berna, Suiza. Formóse como ebanista y agora mesmo trabaya como profesor del métodu Zentangle, técnica pa facer remanar les emociones a traviés del trazu, que se pue apreciar na so bola.

ENEKO EGAÑA

Natural del País Vascu pero namoráu de Porrúa, onde lleva pasando los últimos branos, ye llicenciáu en Belles Artes pola UPV. Anguaño trabaya como director d’arte y creativu freelance.

LA JACINTO

La Jacinto ye’l nomatu de Paula Presa, uvieína criada n’Avilés. Paula ye Llicenciada en Belles Artes, y n’actualidá dedícase a la docencia y al tatuaxe nel so estudiu Géiser, n’Uviéu. La so obra destaca pol color y una estética naíf.

ERNESTO JUNCO

Nacíu n’Asturies, ye Llicenciáu en Belles Artes, y tien amás trés módulos d’escultura, grabáu y serigrafía. La so obra ta venceyada estrechamente col entornu, como podemos ver na so intervención sobre los silos. Nos últimos años trabaya tamién la cerámica.

MARÍA ORTIZ

Nacida n’Uviéu, María Ortiz Iglesias ye llicenciada en Belles Artes y tien desarrollao una carrera bien destacada nel ámbitu de la ilustración y el diseñu gráficu. Ente los sos proyectos más notables alcuéntrase les ilustraciones del llibru Asturianes, editáu por La Fabriquina, que recopila la vida de muyeres que marcaron un finxu na historia d’Asturies.

BREZA CECCHINI

Ye una de les pintores asturianes con más proyección. Formada na Escuela d’Arte d’Uviéu coles especialidaes d’escultura y grabáu. Espunxo de forma individual y colectiva bien de veces, en centros y galeríes d’Asturies, nacionales y internacionales. Tien obres en colecciones de la Delegación de Gobiernu, del Muséu de Belles Artes d’Asturies, na Casa de la Moneda, etc. 

CASILDA RÍU

Naveta, artista y madre d’artista (Breza Cecchini), Casilda Ríu ye tamién artesana, editora d’arte y escritora. Casilda caltién dende va años muncha rellación con Porrúa, yá que fo una de les cabeces que creó lo que ye anguaño’l Mercáu, eventu al que tolos años sigue acudiendo coles sos creaciones.

E1000

Emilio Sanz, residente en Cabranes y madrileñu de nacencia, ye un destacáu artista urbanu español, reconocíu pola so versatilidá y enfoque na xeometría y el color. La so obra abarca dende lo figurativo hasta lo abstracto, con una querencia poles intervenciones sutiles nel espaciu públicu. La so trayectoria emprecipió nel ámbitu del graffiti y la ilustración, evolucionando hacia instalaciones qu’integren materiales como’l vidru, madera y metal. E1000 busca humanizar l’entornu urbanu, revitalizando espacios escaecíos con intervenciones que destaquen pola so sutileza y adaptación al contestu.

INKCULTURE

Pancho Núñez y Marta Torre, poícu y llanisca respectivamente, son dos artistes del conceyu que, amás d’apasionaos pol arte visual, son fundadores y propietarios del estudiu de tatuaxes Inkulture en Llanes. El so trabayu céntrase principalmente nel mundu del tatuaxe, onde fusionen técniques tradicionales con enfoques contemporáneos, crando diseños únicos onde rescampla la so esperiencia y amplia formación.

SURIMI

Surimi ye Paula, de Xixón. Estudió ilustración n’Uviéu y Diseñu Gráficu en Madrid, y anguaño dedícase al tatuaxe. El so estilu caracterízase por influencies del arte naíf, el cómic underground y la estética wabi-sabi, predominando l’usu del negru con detalles en coloráu. Amás del so llabor como tatuadora, Paula tien participao en diverses esposiciones d’arte, mostrando la so versatilidá y compromisu cola escena artística contemporánea.

MARÍA PEÑA 

Conocida artísticamente como MAPECO, ye una destacada artista asturiana ñacida en Xixón. La so obra caracterízase por una esmolición fonda poles consecuencies de la vida occidental nel mediu ambiente, temática que fo esplorando a lo llargo la carrera. Mapeco tien vivío en ciudaes estremaes como São Paulo, Lisboa, Londres, Yakarta, Pekín, Nueva York, Copenhage y Madrid, esplorando los arrabaldes d’estes metrópolis y representando nel so arte les problemátiques sociales y medioambientales observaes.

El so activismu, tanto social como mediuambiental revélase nes sos obres, u enfrenta la dialéctica humanidá/naturaleza a traviés d’elementos como la mázcara, esplorando conceptos rellacionaos cola identidá y el conflictu ente’l ser humanu y l’animal.

SERGIO SANTURIO

 Artista asturianu qu’esplora la bioloxía imaxinaria d’animales y plantes d’otros mundos. La so obra abarca ilustración, escultura, música y botánica. Tien realizaes esposiciones n’Estaos Uníos, amás de talleres n’Alemaña y Portugal.

MARTA PÉREZ CRESPO

Madrileña con raigaños asturianos, Marta estudió Belles Artes n’Aranxuez y remató la so formación como artista en Barcelona. Trabayó en dellos estudios y galeríes en Barcelona y anguaño ye serigrafista nun taller testil, amás de dedicase a la edición d’arte y a la comunicación. La so obra personal fala de la superficialidá de la so xeneración dende un puntu de vista cómicu, gamberru y coloríu.

NIEVES GONZÁLEZ, AIDA ALONSO Y VIRGINIA DOMINGUEZ

Esta obra ye una collaboración ente Nieves González, llicenciada en Belles Artes y natural de Porrúa, y les uvieínes Aida Alonso y Virginia Dominguez, formaes na Escuela d’Arte d’Uviéu. Tres la intervención per separao na primer edición surdió esta idea conxunta que, al mesmu tiempu que fai un xuegu cómicu col nome del eventu reivindica tamién la non sexualización del pechu femeninu y la normalización y aceptación de tolos tipos de pechos.

CORDELIA PICKFORD

Nacida n’Inglaterra pero residente en Llanes dende los 12 años, Cordelia graduóse en Diseñu na Facultá de Belles Artes de Madrid y lleva trabayando como diseñadora y pintora freelance dende’l 2017. Pickford ye famosa polos sos skylines n’acuarela de distinos llugares asturianos.

MS HYDE

Aida vive en Los Caleyos y ye Graduada en Diseñu pola ESAPA. Dedícase tanto al diseñu como a la ilustración freelance y la so obra ta rellacionada cola so rodiada: el mundu rural, qu’analiza siempre con tonu irónicu.

MARTINA RODRÍGUEZ MORÁN

Nacida en Pancar, Llanes, ye una artista plástica que fusiona la so formación n’arquitectura con una pasión profunda poles artes visuales. A los 18 años, treslladóse a Madrid pa estudiar arquitectura na Escuela Politécnica, onde completó los estudios. Anque l’arquitectura fo la base de la so carrera, Martina enfocó la so vocación profesional p’hacia l’arte, destacando en pintura y escultura na so trayectoria.

El so estilu artísticu caracterízase por una combinación de formes xeométriques y colores vibrantes. Martina utiliza la pintura y la escultura pa espresar les sos idees y emociones.

CANDELA PÁJARO

Anque  vive n’Uviéu, dende bien pequeña Candela pasa los branos en Celoriu. Ye llicenciada en Belles Artes y trabaya anguaño como tatuadora. La transición de Candela al mundu del tatuaxe permitió-y fusionar la so formación académica con una forma d’arte más intima y personalizada. Ella mesma describe’l tatuaxe como una disciplina que va acullá de la rellación tradicional ente creador y observador, creando un venceyu fondu coles persones al traviés de les sos obres.