RUTH ÁLVAREZ RODRÍGUEZ

Ruth Álvarez ye una artista multidisciplinar que desenvuelve la so práctica n’Uviéu. Ámás ye xestora cultural y cofundadora d’Estudio Flechazu. La so pintura asítiase ente la nueva figuración y el surrealismu contemporaneu, iguando un imaxinariu propiu onde conviven oxetos, espacios y paisaxes oníricos de colores vibrantes. Na so obrá última garren una presencia central lo natural, lo vexetal, lo místico y lo cósmico. 

Les boles de Ruth garren como referencia estética la gráfica de la portada d’Amami de Yussef Dayes, onde’l paisaxe se constrúi con colores intensos y una visión simbólica de la naturaleza. Les pintures fain un guiñu a la sierra de Cuera y al mar cantábricu de la costa de Llanes.

VERA GALINDO

Diseñadora gráfica de formación, tien afondai n´árees de la ilustración como la editorial infantil, publicitaria, el muralismu y l’animación, siempre cola intención de cuntar histories a traviés d’imáxenes y facer pensar al espectador.

Les boles de Vera falen d’aparar un poco y esfrutar del momentu nestos tiempos nos que paez que siempre tenemos que tar faciendo daqué y siendo productivos, de reconectar con nós mesmes, esfrutar del entornu que nos arrodia y tamién valoralu.

ZAIDA ESCOBAR

Zaida desarrolla’l so trabayu ente la ilustración, el muralismu y el live painting. Participó en bien d’esposiciones colectives y individuales, amás de realizar murales y masterclass per distintes ciudaes d’España. Collaboró con plataformes y proyectos como Naves Matadero, La Tabacalera y Loewe. Anguaño xestiona una academia d’arte en Xixón y trabaya n’estremaos proyectos d’ilustración y muralismu.

Zaida, inspirándose na obra de Francis Bacon, deconstrúi una vaca nestes boles nes que’l xuegu colos materiales y testures y lo que se prioriza.

CASCOXU

Inés ye ilustradora y grabadora. Espoxigó arrodiada de paisaxes verdes y tradiciones rurales, una influencia fundamental na so manera de mirar y cuntar histories. Coles sos ilustraciones busca tresmitir la conexón ente les persones y la so contorna, poniendo en valor lo cenciello y lo natural.

Cascoxu, nes sos boles, trata ún de los temes que más esmuel a la sociedá española: la vivienda, la turisficación y la xentrificación. El so llinguaxe coloríu y les formes dulces contrasten con esti duru mensaxe. 

ISTRICE ILLUSTRA

Andrea ye ilustradora independiente. El so trabayu céntrase na ilustración pa papelería y eventos, ilustración editorial y diseñu de packaging, pero tamién desarrolló una llinia propia d’ilustraciones qu’anguaño vende en más de diez tiendes n’España. La so obra esplora los viaxes, les cultures y los procesos introspectivos. 

La italiana Andrea Franceschi, namorada d’Asturies y impresionada dende que llegó cola rica tradición cultural decide reflexala nes sos boles, enllenes de coloríu y allegría.

JULIA MESA

Julia mesa ye la ganadora del programa educativu pa centros educativos, ye d´Uviéu y estudió fotografía na Escuela d´Arte d´Uviéu. Anguaño, estudia na mesma escuela´l primer cursu de Gráfica Impresa. 

Julia Mesa intervién nes boles con una técnica mesta qu’axunta collage con pintura. La temática gravita al rodiu del prau y la so importancia nel desarrollu de la sociedá asturiana: llugar de trabayu pero tamién de fiesta y celebración.

IVOR ARCE

Artista plásticu y docente de Xixón estudió Belles Artes y un Máster en Pintura na Universidá del País Vascu. El so trabayu céntrase na arquitectura amenazada pola xentrificación y naquellos espacios que cuerren el riesgu d’esapaecer. Cola so obra reivindica una mirada estética alloñada de les lóxiques del mercáu.

Les boles d’Ivor presenten un horru y una panera pero con una estética moderna y underground que busca mecer lo tradicional colo moderno.

MANUEL PRENDES

Manuel Prendes Cimadevilla ñació n’Uviéu, ye cofundador del taller de grabáu y galería d’arte“Ora Labora Studio”, asitiáu en Xixón, onde desenvuelve la so obra propia y edita obra gráfica pa otros artistas, galeríes y instituciones.

Manuel Prendes fai un homenaxe a les fiestes de prau y a los pueblos de la zona inspirándose na indumentaria y actividaes tradicionales pero analizando tamién dende la modernidá: la estética de los carteles pegaos, les pintaes interviniendo sobre lletreros, etc…

NEL GUTIERREZ AMIEVA

Nel ye un mozu porruanu que cursa segundu cursu de Belles Artes na Universidá de Salamanca. Fexo’l bachilleratu artísticu en Cangues d’Onís, y anque sigue a la busca d’un estilu propiu, tien perdefinida la exa del so trabayu: treslladar al arte la so esperiencia como persona queer nel entornu rural.

Nel representa persones diverses reivindicando la igualdá y la llibertá del colectivu LGTBI. 

DATRIGA ESTUDIO

Cartelista autodidacta y “collagista” empederníu. El so imaxinariu nútrese de los espacios abiertos, los caminos y los montes, que funcionen como fonte constante d’inspiración nel so llabor. Nun lu busquéis en redes porque nun tien.

Pulmonaria ye un planeta onde la naturaleza trabaya al so ritmu, ensin interferencies esternes, ensin polución, ensín armes nin guerres,, un espaciu onde la fauna y la flora s’abracen. Pulmonaria ye un llugar llibre. Llibre de seres idiotes y soberbios, onde terraplanistes, negacionistes, adustos predicadores son fagocitaos pola guapura salvaxe de la viesca y devueltos a la tierra en forma de cuchu…del que ñacen flores

OSGILIART

Marta tien 21 años y cursa l’últimu añu de Belles Artes na Universidá Politécnica de Valencia. Anque ñació en Valencia, la so familia paterna ye de La Pereda, un llugar al que vuelve cada veranu dende neña pa esfrutar de la familia, el paisaxe y les fiestes de la rodiada. La so obra, de carácter pictóricu, alcuentra inspiración nesos paisaxes venceyaos a la memoria familiar y al entornu rural.

Les boles de Marta son un homenaxe a so güela Lily y a los sos hermanos, Titi y Benito, qu’inculcaron nella l’amor poles tradiciones asturianes y la inspiraron pa caltener viva la so herencia con orguyu.

LAURA CABEZA

Laura cubrió les boles con tapetes de ganchiyu: reales o de pintura. Con esta propuesta reivindica la tradición y l’artesanía como parte esencial nel arte, poniendo en valor el trabayu manual y los saberes tresmitíos de xeneración en xeneración.

Laura vive en Llanes y ye llicenciada en Belles Artes pola Universidá de Vigo. Compaxina la so práctica artística col trabayu como interiorista. Na so obra esplora la importancia de la tradición y l’artesanía, asina como la carga simbólica qu’estes caltienen anguaño.

JOOLS

Jools ye una artista y ilustradora nacida en Buenos Aires, que se treslladó a Asturies siendo mui pequeña. Dende entós, la so obra nútrese de la multiculturalidá y de la espresión humana como fontes principales d’inspiración. Nos sos dibuxos axúntase un carácter punk con un estilu cute, xenerando un llingüaxe visual propiu y llamaderu.

Jools convida a percorrer les sos boles col diseñu que les arrodia, con arcos y puertes colos que s’entemecen elementos como una flor y una maza, casando la sensibilidá cola fuerza y una caballera y un cuélebre que, en cuenta d’engarrase por un tesoru, viven n’armonía esfrutando de los campos.

ANA MELJO

Diseñadora y creadora de vestuariu, con una práctica inspirada nel folclore, la naturaleza, les histories de muyeres y la danza. Trabaya con técniques testiles y materiales reciclaos, dando vida nueva a rellatos venceyaos a la memoria y al llugar. La so trayectoria desenvuélvese ente Asturies, Eslovenia y Escocia, onde conecta l’arte cola comunidá.

La bola de Meljo ta vistida con una tela estampao con cianotipia, con imáxenes de redes de pesca, vidru marín, cerámica, conches y fragmentos de vidru. Con estos mesmos elementos ta bordao la tela. Too esto acompáñase de les propies redes donaes pola Cofradía de Pescadores de Llanes y reflexona sobre la conexón ente la costa asturiana, les tradiciones pesqueres locales y los materiales moldiaos pol mar.  

LA BIXXA

Labixxa desenvuelve’l so trabayu a partir de lo cotidiano, les emociones y les rellaciones iterpersonales y col entornu. La so obra busca xuncir el compromisu social cola creación artística a traviés del mundu natural, los venceyos con otres especies y la puesta en valor del apoyu mutuu.

Na so bola, la Bixxa reflexona sobre les dificultaes que plantega desenvolvese nel mundu rural, pero manda un mensaxe de resistencia.